- Gəldin?... Xoş gəldin, uzun zamandır görüşmürdük, səndən ötrü darıxmışdım, əzizim! Hər an yolunu gözlədim, gecə-gündüz... Gecələr daha uzun olurdu, sabahlar açılmırdı sənsiz. Sənsizliyim ürəyimdə bir dərd idi.
- Mənə də çətin idi, əzizim! Gəldim ki, mənimlə gedəsən, axı illərdir sən də məni gözləyirsən! İllərdir qəlbim səni düşünür. Heç kimi sevə bilmədim səndən sonra. Uzun zamandır məni yaşadan tək sənin sevgin, sənin məhəbbətindir. Hər an mənə bir il kimi gəlir. Birlikdə gedək. Uzun bir səfərə çıxaq. Daha sənsizliyə dözə bilmirəm. Hər şey məni sıxır, hər yerdə, hər an gözüm səni axtarır. Düşünürdüm ki, qəfildən qarşıma çıxacaqsan. Səni görəcəyəm , deyə arxayın idim. Lakin, səni heç yerdə görə bilmirdim. Sanki sən yox olmuşdun. Dünya mənə boş görünürdü. Axı , harda idin? Hərdən mənə elə gəlirdi ki, səni tamamilə itirəcəyəm. Çox axtardım , səni, lap çox... Səni tapmaq mənə çətin oldu. İndi sən mənimsən. Mənimlə gedək.
- Hə, düz deyirsən, səndən ötrü mən də yaman darıxmışdım. Gözlərim yollara dikilmişdi, ürəyim bir söz deyirdi, dilim başqa söz. Ətrafdakılar da məni sıxırdı sanki. Günlərim bitmək bilmirdi, hər şeydə bir əzab görürdüm. Həyatımı nəyinsə, kiminsə xatirinə dəyişdim, yox-yox, anamın xatirinə dəyişdim. Axı mən anamı çox sevirdim. Onu incitmək, ona əzab vermək istəmirdim. O xəstə idi, həm də atamın qəfil ölümü ona bir dərd olmuşdu. Eh, sənsiz illər məni qocaltdı. Anam da xəstəliyindən dünyasını dəyişdi. Bu illər ərzində sanki içimdə min sual vardı. Axı sən hardasan? Niyə gəlmirsən? Elə mənimlə bir vətəndə olsaydın mənə bəs edərdi. Fikirləşərdim ki, bir az yaxınıq. Nə vaxtsa qarşılaşarıq. Onda ürəklərimiz özümüzdən gizlin məhəbbətdən danışar.
- Gedək mənimlə, bizim üçün orda yaxşı olacaq . Bir zamanlar xəyalımızda qurduğumuz o xoşbəxt həyatı orda birlikdə qura bilərik. Evimiz, ailəmiz , uşaqlarımız olar. Sonra onları böyüdərik. Mən səndən gözəl bir qızımın olmasını istərdim, elə sənin kimi gözəl! İkimiz də xoşbəxt olarıq. Gedək mənimlə, sevgilim! Amma geriyə baxma , sonra gec olar.
- Hə, əzizim, hazırlşmaq lazımdır.
- Yox, hazırlaşma , elə buradan gedək. Səni yenidən itirməyimdən qorxuram. Sənzisliyə dözmək mənə çox çətin oldu. Hər an arxanca gəlməyi düşünürdüm.
- Mənə də çətin idi. Mən də darıxırdım. Eh, artıq saçlarına da dən düşüb. Zaman nə tez keçdi!
- Hə, zaman sona çatmasın deyə, gedək. Birdən zamanımız qalmaz daha. Hər anın bir hökmü var. Dəqiqələr, saatlar bizə mane ola bilər. Vaxtında yaşaya bilmədiyimiz xəyallarımızı indi gerçəkləşdirək. Sevgilim, gəl gedək, tez ol, düşünmədən, geriyə baxmadan, gedək!
- Hə, getmək lazımdır, artıq, gecdir. Yalnız ikimiz gedirik?
- Hə, mən və sən.
- Axı...
- Yubanma, sənə görə gəlmişəm, dözmədim, ürəyim dözmür artıq, fikirlər yorur məni. Birlikdə olmağımız daha gözəldir. Dedim axı, tez ol , əlini ver.
- Hə, gedək. Dayan, səs gəlir...
Geriyə baxdı. Çox sonralar qurduğu evlilikdən iki qızı vardı, Aydanla , Fidan. Səs onların səsi idi. Leyla illərdən bəri sevdiyi kəslə uzun yola çıxa bilmədi.
